கர்நாடகாவில் உருவாகி, ஆந்திரா வழியாக தமிழ்நாட்டுக்கு வரும் பாலாறுதான் வேலூர், திருவண்ணாமலை, திருவள்ளூர், காஞ்சிபுரம் உள்ளிட்ட நான்கு மாவட்ட மக்களின் தாகத்துக்கும், விவசாயத்துக்கும் முக்கிய நீராதாரம். இப்படி, எஞ்சிவரும் நீரையும் தடுத்து நிறுத்தும் விதமாக ஆந்திர முதல்வர் அறிவித்திருக்கும் தடுப்பணை திட்டம், தமிழக அரசியல் தலைவர்களை முட்டல் மோதலில் நிறுத்தியிருக்கிறது.
அறிவிப்பு வெளியிட்ட ஜெகன்மோகன் ரெட்டி:
ஆந்திரா, குப்பம் சட்டமன்றத் தொகுதியில் நடைபெற்ற பொதுக்கூட்டத்தில் பேசிய முதல்வர் ஜெகன்மோகன் ரெட்டி, `தமிழ்நாடு-ஆந்திரா எல்லையில் கனகதாச்சியம்மன் கோவில் அருகிலிருக்கும் பாலாறு நீர்தேக்கத்தில் தண்ணீர் சேகரிக்கும் அளவை உயர்த்தப் போவதாகவும், அதற்காக ரூ.120 கோடி ஒதுக்கியிருப்பதாகவும் கூறினார். மேலும், குடிப்பள்ளியில் 0.77 டிஎம்சி, சாந்திபுரத்தில் 0.33 டிஎம்சி தண்ணீரையும் சேமிக்க இரண்டு நீர்த்தேக்கங்கள் கட்ட ஏற்பாடு செய்யப்பட்டுள்ளதாகவும், அதற்காக ரூ.250 கோடி ஒதுக்கியிருப்பதாகவும் தெரிவித்தார்.
ஸ்டாலினை விமர்சித்த இ.பி.எஸ்:
ஆந்திர முதல்வரின் இந்தப்பேச்சு, பாலாற்றை நம்பியிருக்கும் தமிழக விவசாயிகளிடையே பெரும் அதிர்ச்சியையும், கொந்தளிப்பையும் ஏற்படுத்தியது. அதையடுத்து கண்டன அறிக்கை வெளியிட்ட தமிழ்நாடு எதிர்க்கட்சித் தலைவர் எடப்பாடி பழனிசாமி, `தமிழக மக்களுக்கு விடியலைத் தருவோம் என்று பசப்பு வார்த்தைகளைக்கூறி ஆட்சிக்கு வந்த இந்த கையாலாகாத அரசு இதை தடுக்க எந்த நடவடிக்கையும் எடுக்காதது வெட்கக்கேடானது. இந்தத்திட்டம் குறித்து நன்கு அறிந்தும், தி.மு.க அரசின் முதல்வர் மு.க. ஸ்டாலினும், நீர்வளத்துறையும் எதிர்ப்பு தெரிவிக்காமல் கள்ள மவுனம் சாதிப்பது ஏன் என்று தெரியவில்லை. கும்பகர்ண தூக்கத்தை கைவிட்டு விட்டு, உடனடியாக ஆந்திர அரசின் இந்த போக்கை தடுத்து நிறுத்த வேண்டும். நீதிமன்றத்தின் மூலமாக இதற்கு தீர்வு காண உரிய நடவடிக்கை எடுக்க வேண்டும்" என கடும் விமர்சனத்துடன் கோரிக்கை வைத்தார்.
இ.பி.எஸ்-ஸை நக்கலடித்த துரைமுருகன்:
இதற்குப் பதிலடி கொடுக்கும்விதமாக எதிர் அறிக்கை வெளியிட்ட நீர்வளத்துறை அமைச்சர் துரைமுருகன், `அது ஒரு பொதுக்கூட்ட செய்திதான். அந்த செய்தியை வைத்துக் கொண்டு தளபதி அரசு என்ன சாதித்துவிட்டது என்று அவசர குடுக்கையாக எதிர்க்கட்சித் தலைவர் ஒரு அறிக்கை விட்டிருப்பதைப் பார்த்து எனக்கு அழுவதா? சிரிப்பதா? என்று தெரியவில்லை. இப்படித்தான் முன்னர் ஒரு முறை கணேசபுரத்தில் அணை கட்டப்போவதாக வந்த செய்தியைப்பார்த்து சில அறிக்கை தலைவர்கள் அறிக்கைகளை வெளியிட முதல்வரும் நானும் கணேசபுரம் போய் பார்த்தோம். அணை கட்டுவதற்கான எந்த அறிகுறியும் அங்கு இல்லை.
இதுதொடர்பாக உச்ச நீதிமன்றத்தில் நிலுவையில் உள்ள வழக்குகளை இவ்வரசு தீவிரமாக கண்காணித்துக் கொண்டிருக்கிறது. தேவையான நடவடிக்கைகளை தக்க நேரத்தில் எடுக்கும். இந்த நிர்வாக ரீதியான செயல்பாடுகள் எல்லாம் எடப்பாடியாருக்கு தெரிந்திருக்க நியாயம் இல்லை. இ.பி.எஸ் எந்த அணையையும் கட்டவில்லை. அந்தரத்தில் நீர்ப்பாய்ச்சும் அரசாங்கம் நடத்திவிட்டு போனவருக்கு நிர்வாக நடைமுறைகள் எப்படி தெரியும்?" என காட்டமாகக் கேள்வியெழுப்பினார்.
இ.பி.எஸ்-க்கு ஆதரவாக துரைமுருகனை வம்பிழுத்த ஓ.பி.எஸ்:
இந்த நிலையில், இ.பி.எஸ்-ஸை விமர்சித்த துரைமுருகனின் பதிலடிக்கு, பதிலடி கொடுக்கும் விதமாக அ.தி.மு.க முன்னாள் முதல்வர் ஓ.பன்னீர்செல்வம் அறிக்கை வெளியிட்டிருக்கிறார். அதில், `2001-2006 வரையிலான அ.தி.மு.க ஆட்சிக் காலத்தில் நடந்ததை துரைமுருகன் மறந்துவிட்டார் அல்லது தனக்கு வசதியாக மறைத்துவிட்டார். அந்த ஆட்சிக்காலத்தில் பாலாற்றின் குறுக்கே அணை கட்டப் போவதாக செய்தி வந்ததும், `1892-ம் ஆண்டு ஒப்பந்தப்படி கீழ்ப்பகுதியிலுள்ள மாநிலங்களின் முன் அனுமதியின்றி எந்த ஒரு புதிய அணைக்கட்டவோ, நீரைத் தடுப்பதற்கான கட்டுமானங்களையோ கட்டக்கூடாது என ஆந்திர முதல்வருக்கு கடிதம் எழுதினார் துரைமுருகன். அதுமட்டுமல்லாமல், `பாலாறு சஹாரா பாலைவனமாகக்கூடிய நிலைமை உருவாகிவிடும்; அதிகாரிகள் அங்கு அளவெடுத்துக் கொண்டிருக்கிறார்கள்; மிகப் பெரிய கொந்தளிப்பு, பதற்றம் ஏற்பட்டிருக்கிறது என்றெல்லாம் பேசினார்.
ஆனால், தற்போதைய செய்தியை பெரிதாக எடுத்துக்கொள்ளத் தேவையில்லை என்பதுபோல் அவரின் அறிக்கை அமைந்திருக்கிறது. இது சாதாரண பத்திரிகைச் செய்தி அல்ல, ஆந்திர முதல்வரின் பேச்சு பத்திரிகையில் செய்தியாக வெளி வந்திருக்கிறது. இதற்கு எதிர்வினை ஆற்ற வேண்டிய கடமையும் பொறுப்பும் தமிழ்நாடு அரசுக்கு உண்டு" என துரைமுருகனுக்கு கொட்டு வைத்திருக்கிறார்.
`அறிக்கைச் சண்டையை விடுத்து, ஆக்கப்பூர்வமான நடவடிக்கையை எடுங்கள்!' என்பதே மக்களின் கோரிக்கை!
மேலும் படிக்க பாலாற்றின் குறுக்கே ஆந்திரா கட்டும் அணை: மோதிக்கொண்ட இ.பி.எஸ் - துரைமுருகன் - ஓ.பி.எஸ்!
