சமூக ரீதியாகவும் பொருளாதார ரீதியாகவும் பீகார் மாநிலம் பின்தங்கி இருப்பதால், பீகாருக்கு சிறப்பு அந்தஸ்து வழங்க வேண்டும் என்று முதல்வர் நிதிஷ் குமார் மத்திய அரசை வலியுறுத்திவருகிறார். ஆனால், அவரின் கோரிக்கையை மத்திய பா.ஜ.க அரசு கண்டுகொள்ளவில்லை.
இந்த நிலையில், ‘2024-ல் நடைபெறவிருக்கும் நாடாளுமன்ற பொதுத்தேர்தலுக்குப் பிறகு பா.ஜ.க அல்லாத கட்சிகளைக் கொண்ட கூட்டணி மத்தியில் ஆட்சியமைத்தால், பின்தங்கிய அனைத்து மாநிலங்களுக்கும் சிறப்பு அந்தஸ்து வழங்கப்படும்’ என்று நிதிஷ்குமார் பேசியிருக்கிறார்.
புவியியல் ரீதியாகவும் சமூக, பொருளாதார ரீதியாகவும் முன்னேறுவதற்கான வாய்ப்பு குறைவாக இருக்கும் மாநிலங்களின் மேம்பாட்டுக்காக, சிறப்பு அந்தஸ்து வழங்கும் முறை 1969-ம் ஆண்டு கொண்டுவரப்பட்டது. இதன் மூலமாக, மத்திய அரசிடமிருந்து கூடுதல் வரிவருவாய், வளர்ச்சித் திட்டங்களை மாநிலங்கள் பெறலாம். இதன் கீழ் அஸ்ஸாம், நாகாலாந்து, இமாச்சலப்பிரதேசம், மணிப்பூர், மேகாலயா, சிக்கிம், உத்தராகண்ட், தெலங்கானா உள்பட சில மாநிலங்கள் சிறப்பு அந்தஸ்து பெற்றிருக்கின்றன.
அதைப்போல, பீகாருக்கு சிறப்பு அந்தஸ்து வழங்கப்பட வேண்டும் என்று நிதிஷ்குமார் கோரி வருகிறார். அவரின் கோரிக்கையை மறைமுகமாக நிராகரிக்கும் வகையில், ‘எந்த மாநிலத்துக்கும் சிறப்பு அந்தஸ்து வழங்க நிதிக்குழு பரிந்துரைக்கவில்லை’ என்று கூறியிருக்கிறார் மத்திய நிதியமைச்சர் நிர்மலா சீதாராமன். இந்த நிலையில்தான், 2024-ல் நடைபெறவிருக்கும் நாடாளுமன்ற பொதுத்தேர்தலில் பா.ஜ.க அல்லாத கூட்டணிக் கட்சிகளின் ஆட்சி அமைந்தால், பின்தங்கிய மாநிலங்களுக்கு சிறப்பு அந்தஸ்து வழங்கப்படும் என்று நிதிஷ்குமார் கூறியிருக்கிறார்.
நிர்மலா சீதாராமன் கருத்துக்கு பீகார் மாநில நிதியமைச்சர் விஜய்குமார் சௌத்ரி எதிர்வினையாற்றியிருக்கிறார். ‘பொருளாதார ரீதியாக பின்தங்கிய மாநிலங்களுக்கு சிறப்பு அந்தஸ்து வழங்குவது குறித்து நிதி ஆயோக்கில் விவாதிக்கப்பட்டுவருகிறது. இந்த நேரத்தில், மத்திய நிதியமைச்சர் இவ்வாறு பேசியிருப்பதன் மூலம் இதற்கு முட்டுக்கட்டைப் போடுவதாக அமைந்துவிட்டது. பின்தங்கிய மாநிலங்களுக்கு சிறப்பு நிதி அளிக்கப்படாவிட்டால், மாநிலங்களுக்கு இடையேயும் பிராந்தியங்களுக்கு இடையேயும் ஏற்றத்தாழ்வுகள் உருவாக்கும்” என்று கூறியிருக்கிறார் விஜய்குமார் சௌத்ரி.
பீகார் மாநிலத்துக்கு சிறப்பு அந்தஸ்து வழங்கப்பட வேண்டும் என்ற கோரிக்கையை முன்வைப்பவர்கள், ‘பீகார் மாநிலத்தின் வளர்ச்சி, தேசிய சராசரியைவிட அதிகமாகவே இருக்கிறது. ஆனாலும், நாட்டிலேயே ஏழ்மையான நிலையில் பீகார் இருக்கிறது. எனவே, இந்த மாநிலத்துக்கு சிறப்பு அந்தஸ்து வழங்கப்பட வேண்டும்’ என்று வலியுறுத்துகிறார்கள்.
பீகாரில் முதல்வர் நிதிஷ்குமார் தலைமையில் ஐக்கிய ஜனதா தளத்தின் ஆட்சி நடைபெற்றுவருகிறது. 2013-ம் ஆண்டு பா.ஜ.க-வுடனான கூட்டணிலிருந்து விலகி, லாலு பிரசாத் யாதவ் தலைமையிலான ராஷ்டிரீய ஜனதா தளத்துடன் கூட்டணியில் இணைந்தது நிதிஷ்குமாரின் கட்சி.
பிறகு, 2017-ம் ஆண்டு அந்தக் கூட்டணியிலிருந்து விலகி, பா.ஜ.க-வுடன் மீண்டும் கூட்டணி அமைத்தது நிதிஷ்குமாரின் கட்சி. கடந்த ஆண்டு பா.ஜ.க கூட்டணியை விட்டு விலகி ராஷ்டிரீய ஜனதா தளத்துடன் மீண்டும் கைகோத்த நிதிஷ்குமார், ‘பா.ஜ.க-வுடன் கூட்டணி வைப்பதைவிட உயிரை மாய்த்துக்கொள்வேன்’ என்று சமீபத்தில் கூறினார். எனவே, கடுமையான எதிர்நிலையில் இருக்கும் இருக்கும் நிதிஷ்குமார் ஆட்சி நடைபெறும் பீகாருக்கு சிறப்பு அந்தஸ்து வழங்க மத்திய அரசு தயாராக இல்லை என்பதை வேறு வார்த்தைகளில் நிர்மலா சீதாராமன் உறுதியாகத் தெரிவித்திருக்கிறார் என்கிறார்கள் அரசியல் பார்வையாளர்கள்.
மேலும் படிக்க `பீகாருக்கு சிறப்பு அந்தஸ்து' - வலியுறுத்தும் நிதிஷ்குமார்... கைவிரிக்கும் நிர்மலா சீதாராமன்!
