Doctor Vikatan: சருமத்தைப் பொலிவாக்க சர்க்கரையையும் காபித்தூளையும் ஸ்க்ரப்பராக பயன்படுத்தலாமா?
பதில் சொல்கிறார், சென்னையைச் சேர்ந்த சரும மருத்துவர் செல்வி ராஜேந்திரன்
நம்முடைய சரும செல்கள் 28 நாள்களுக்கொரு முறை உதிர்ந்து, புதிய செல்கள் உருவாகும். சரும ஆரோக்கியத்துக்கு 'எக்ஸ்ஃபோலியேஷன்' எனப்படும் இந்தச் சுத்திகரிப்பு முறை மிக முக்கியம். இது 'பிசிகல் எக்ஸ்ஃபோலியேஷன்', 'கெமிக்கல் எக்ஸ்ஃபோலியேஷன்' என இருவகைப்படும்.
சற்றே கொரகொரப்பான ஸ்க்ரப் பயன்படுத்தி சருமத்தின் இறந்த செல்களை நீக்குவது பிசிகல் எக்ஸ்ஃபோலியேஷன் எனப்படும். மருத்துவத்தன்மை வாய்ந்த பொருள்களைப் பயன்படுததி சருமத்தின் இறந்த செல்களை நீக்குவது கெமிக்கல் எக்ஸ்ஃபோலியேஷன் எனப்படும். இந்த இரண்டில் கெமிக்கல் எக்ஸஃபோலியேஷன் என்பது சருமத்துக்கு மிகவும் பாதுகாப்பானது. ஏனென்றால் பிசிகல் எக்ஸ்ஃபோலியேஷனில் பயன்படுத்தப்படுகிற பொருள்களின் துகள்கள் சற்றே பெரிதாக இருக்கும் என்பதால் சருமத்தை பாதிக்கக்கூடும்.
ஏற்கெனவே சென்சிட்டிவ் சருமம் கொண்டவர்களுக்கு பிசிகல் எக்ஸ்ஃபோலியேஷன் செய்வதால், சருமத்திலுள்ள பருக்கள் அதிகரிக்கவும், தொற்று அதிகரிக்கவும், தழும்புகள் ஏற்படவும் கூடும். காபித்தூள், சர்க்கரை போன்றவை பிசிகல் எக்ஸ்ஃபோலியேஷன் வகையில் வரும் என்பதால் அவற்றை உபயோகிப்பதைத் தவிர்ப்பதே சிறந்தது.
சர்க்கரையை உதடுகளில் உள்ள சருமத்தை எக்ஸ்ஃபோலியேட் செய்ய பலரும் பயன்படுத்துகிறார்கள். கரகரப்பான தன்மை கொண்ட இதுபோன்ற பொருள்களை சருமத்தில் வைத்துத் தேய்க்கும்போது சருமத்தில் சின்னச்சின்ன, லேசான காயங்கள், தழும்புகள் ஏற்படலாம். வாட்ஸ்அப் ஃபார்வேர்டுகளை நம்பி இதுபோன்ற பொருள்களை சருமத்தில் முயற்சி செய்யாமலிருப்பதே சிறந்தது.
உங்கள் கேள்விகளை கமென்ட் பகுதியில் பகிர்ந்து கொள்ளுங்கள்; அதற்கான பதில்கள் தினமும் விகடன் இணையதளத்தில் #DoctorVikatan என்ற பெயரில் வெளியாகும்.
மேலும் படிக்க Doctor Vikatan: சருமத்தைப் பொலிவாக்க சர்க்கரையையும் காபித்தூளையும் பயன்படுத்தலாமா?
