மதுரையில் அதிமுக எழுச்சி மாநாடு:
அதிமுக எழுச்சி மாநாடு மதுரையில் பிரமாண்டமாக இன்று நடைபெற உள்ளது. இன்று காலை கட்சி கொடியை ஏற்றிவைத்து மாநாட்டை தொடக்கி வைக்கிறார் பொதுச்செயலாளர் எடப்பாடி பழனிசாமி. அப்போது ஹெலிகாப்டர் மூலம் மலர்கள் தூவ ஏற்பாடு செய்யப்பட்டுள்ளது. மேலும் அதிமுக அம்மா பேரவையின் சார்பில் 4 ஆயிரம் தொண்டர்கள் சீருடை அணிந்து எடப்பாடி பழனிசாமிக்கு அணிவகுப்பு மரியாதை செலுத்துகின்றனர். தொடர்ந்து மாநாட்டில் அதிமுக புகைப்பட கண்காட்சி, கலை நிகழ்ச்சிகள், பட்டிமன்றம், இசை கச்சேரி, மூத்த நிர்வாகிகளுக்கு பொற்கிழி வழங்குவது என பல நிகழ்ச்சிகள் திட்டமிடப்பட்டுள்ளது.
10 க்கும் மேற்பட்ட தீர்மானங்கள் இந்த மாநாட்டில் நிறைவேற்றப்பட உள்ளன. காலையில் கொடியேற்றிய பிறகு, ஓய்வெடுக்கச் செல்லும் எடப்பாடி பழனிசாமி, மாலை 4.30 மணிக்கு மீண்டும் மேடைக்கு வருகிறார். மாலை 6 மணிக்கு தொண்டர்கள் மத்தியில் சிறப்புரை ஆற்றுகிறார். மாநாடு காரணமாக வலையங்குளம் பகுதிக்கு வரக்கூடிய அனைத்து வாகனங்களும் மாற்றுப்பாதையில் இயக்கப்படுகின்றன. மேலும், அதிமுக மாநாட்டை ஒட்டி, ஆயிரத்துக்கும் மேற்பட்ட காவல்துறையினர் பாதுகாப்பு பணியை மேற்கொண்டு வருகின்றனர்.
திமுக உண்ணாவிரத போராட்டம்!
கடந்த வாரத்தில் சென்னை ஆளுநர் மாளிகையில் நடைபெற்ற நிகழ்ச்சியில், ஆளுநர் ரவி நீட் விலக்கு மசோதா குறித்து பேசும் போது, தான் ஒருபோதும் நீட் விலக்கு மசோதாவுக்கு ஒப்புதல் அளிக்க மாட்டேன் என தெரிவித்தார். இந்த கருத்து தமிழ்நாட்டில் சர்ச்சையாக வெடித்தது.
இதனை தொடர்ந்து திமுக இளைஞர் அணி, மாணவர் அணி, மருத்துவ அணி ஆகிய அணிகள் சார்பில், உண்ணாவிரத போராட்டம் அறிவிக்கப்பட்டது. அதிமுக மாநாடு நடைபெறும் நாளில் திமுக போராட்டம் அறிவித்ததால், இந்த இரு நிகழ்வுகளும் அரசியல் முக்கியத்துவம் பெற்றது.
இதனை தொடர்ந்து நீட் தேர்வை ரத்து செய்யக் கோரி திமுக இளைஞர், மாணவர், மருத்துவ அணிகள் சார்பில் தமிழகம் முழுவதும் இன்று உண்ணாவிரதப் போராட்டம் நடைபெறுகிறது. சென்னை வள்ளுவர் கோட்டம் அருகில் நடைபெறும் போராட்டத்தில் உதயநிதி ஸ்டாலின் பங்கேற்கிறார். மாவட்ட தலைநகரங்களில் நடக்கும் உண்ணாவிரத போராட்டங்கள் மாநில அமைச்சர்கள் சட்டமன்ற உறுப்பினர்கள் கலந்து கொள்வார்கள் என எதிர்பார்க்கப்படுகிறது.
மதுரையில் பழங்காநத்தத்தில் உண்ணாவிரதம் இருக்க முதலில் ஏற்பாடு செய்யப்பட்டது. மதுரையில் இன்று அதிமுக மாநாடு நடப்பதால், திமுக உண்ணாவிரதம் ஆக.23-க்கு தள்ளிவைக்கப்பட்டுள்ளது.
மேலும் படிக்க ADMK, DMK: அதிமுக மதுரை மாநாடு... திமுக உண்ணாவிரதம் | Live Updates
